SEKOLY SABATA
FITOMBOANA ARA-PANAHY
Ny Baiboly dia mampiseho fa ny zanaka notorontoronin'Andriamanitra dia tsy maintsy mivoatra ara-panahy, alohan'ny hahaterahany ao amin'ny Fianakavian'Andriamanitra. Raha mbola mety maty izy, dia tokony hitombo bebe kokoa amin'ny toetran’Andriamanitra - mampitombo hatrany ny saina sy ny toetran'i Jesosy Kristy.
Andao hianarantsika ao amin’ny Soratra Masina ny fomba hanatanterahana izany fanovana sy fitomboana mahagaga izany, satria amin'ny alàlan'ny fianarana Baiboly, sy ny vavaka, ary ny fankatoavana an'Andriamanitra no fanatanterahana an’izany.
1. Tokony hanova ny fomba fiainany taloha izay mifanohitra amin'ny Lalàn'Andriamanitra ve ny Kristiana notorontoronin’ny Fanahy Masina? Izao no voasoratra: Rom 12: 1-2; Efes. 4:22-24.
[Ny fitondran-tena mahamendrika ny Kristiana] (Romana 12:1) « Koa amin'izany mangataka aminareo aho, ry rahalahy, noho ny famindram-pon'Andriamanitra, mba hatolotrareo ny tenanareo ho fanatitra velona, masina, sitrak'Andriamanitra, dia fanompoam-panahy* mety hataonareo izany. [* Na: fanompoam-pivavahana] » (Romana 12:2) « Ary aza manaraka ny fanaon'izao tontolo izao; fa miovà amin'ny fanavaozana ny saina, hamantaranareo ny sitrapon'Andriamanitra, dia izay tsara sady ankasitrahana no marina*. [* Gr. tanteraka]. »
(Efesiana 4:22) « mba hialanareo ny toetrareo* taloha araka ny fitondran-tenanareo fahiny, izay mihasimba araka ny filan'ny fitaka; [* Gr. olonareo] »
Inona no vokatr'izany fiovana izany eo amin'ny tena Kristiana? Andininy 23-24. Vakio koa ny andininy 25-32 sy ny toko 5: 1-12.
(Efesiana 4:23) « fa mba hohavaozina kosa ianareo amin'ny fanahin'ny sainareo, » (Efesiana 4:24) « ary mba hotafinareo ny toetra* vaovao, izay noforonina araka an'Andriamanitra amin'ny fahitsiana sy ny fahamasinana momba ny fahamarinana. [* Gr. olona] » (Efesiana 4:25) « Koa esory ny lainga, ka samia milaza ny marina amin'ny namany avy ianareo rehetra; fa samy isan'ny momba ny tenan'ny namantsika avokoa isika. » (Efesiana 4:26) « Tezera, fa aza manota; ary aoka tsy ho tratry ny masoandro milentika ny fahatezeranareo. » (Efesiana 4:27) « Aza manome fitoerana ho an'ny devoly. »
Fanamarihana: Ny fihevitry ny saina dia tsy maintsy ovaina – izany hoe mila miova fo. Ity fiovam-po ity dia dingana lehibe tokoa. Mila fahagagana izany! Ny Fanahy Masina no hery mahagaga ilaina amin’ny fanavaozana ny sain'ny olona iray.
2. Noho izany, amporisihina hitombo ara-panahy ve ny Kristiana? II Pet. 3:18.
(2 Petera 3:18) « fa mitomboa amin'ny fahasoavana sy ny fahalalana an'i Jesosy Kristy, Tompontsika sy Mpamonjy. Ho Azy anie ny voninahitra ankehitriny sy mandrakizay. Amena. »
Moa ve mila manetry tena izy ireo, ho toy ny zazakely mitombo ara-panahy? 1 Pet. 2: 1-2; Mat. 18: 2-3.
(1 Petera 2:1) « Koa esory ny lolompo rehetra sy ny ny fihatsaram-belatsihy sy ny fialonana ary ny fanaratsiana rehetra, » (1 Petera 2:2) « fa tahaka ny zaza vao teraka dia maniria ny rononom-panahy tsy misy fitaka, mba hitomboanareo amin'izany ho amin'ny famonjena, »
(Matio 18:2) « Ary Jesosy niantso zazakely anankiray hankeo aminy, dia nametraka azy teo afovoany » (Matio 18:3) « ka nanao hoe: Lazaiko aminareo marina tokoa: Raha tsy miova* ianareo ka ho tonga tahaka ny zazakely, dia tsy hiditra amin'ny fanjakan'ny lanitra mihitsy ianareo.[*Gr. mitodika] »
Fanamarihana: Araka ny nohazavaina teo aloha, rehefa nahazo ny Fanahin'Andriamanitra isika, dia torontoronina tao an-tsaintsika ny fiainana masina. Nanomboka toy ny "tsaika" kely ara-panahy ny fiainam-panahintsika, izay tokony hitombo manomboka eo.
3. Tokony hiezaka manana ny toetran'Andriamanitra ve isika? Mat. 5:48.
(Matio 5:48) « Koa amin izany aoka ho tanteraka ianareo toy ny fahatanterahan'ny Rainareo Izay any an-danitra. »
Fanamarihana: Koa satria tsy misy olombelona (afa-tsy i Jesosy Kristy) hahavita fiainam-panahy masina tanteraka, dia ambaran’i Jesosy mazava amin'ny teniny, fa mila miezaka isika hanana toetra manakaiky ny fahamasinan’ny Raintsika any an-danitra.
(1 Jaona 3:2, 9) « Ry malala, ankehitriny aza dia zanak'Andriamanitra isika, nefa tsy mbola naseho izay ho toetsika rahatrizay. Fantatsika fa raha hiseho Izy, dia ho tahaka Azy isika, fa ho hitantsika Izy, dia izay tena endriny tokoa. » (1 Jaona 3:9) « Izay rehetra naterak'Andriamanitra no tsy manota, satria ny voany mitoetra ao anatiny, ary tsy mahay manota izy, satria naretak'Andriamanitra. »
Inona marina izany ny fitomboana ara-panahy? Fitomboana amin’ny toetran'Andriamanitra lavorary sy masina ary marina izany! Ny firaisan'ny sainao amin'ny Fanahy Masina no hitsirian’ny toetran’Andriamanitra ao anatinao (II Pet. 1: 4).
(2 Petera 1:4) « ary izany no nahatanterahany amintsika ireo teny fikasana sady soa no lehibe indrindra, mba ho tonga mpiray amin'ny fomban'Andriamanitra amin'izany ianareo, rehefa afa-nandositra ny fahalotoana izay eo amin'izao tontolo izao noho ny filàna; »
Hahatonga ny fitomboan’ny toetran’Andriamanitra ao anatinao izany. Raha vao torontoronin’ny Fanahy isika, dia hitombo tsikelikely amin'ny toetran’Andriamanitra, ka hitovy aminy bebe kokoa hatrany amin’ny fomba fieritreretana sy fitenenana ary fanaovan-javatra.
Mampitombo ny toetran'Andriamanitra isika amin'ny alàlan'ny fankatoavana Azy ary amin'ny fanomezana sy fanampiana ny hafa. Io karazana toetran'Andriamanitra io dia novolavolain'ny Kristiana tamin'ny alàlan'ny safidy malalaka tsy miankina, miaraka amin'ny fianarana, ny traikefa, ny fanandramana ary ny fitsapana.
Mahaliana ny manamarika fa ny traikefa an-taonany maro miaraka amin’ny olona avy amin’ny ambaratongam-piaraha-monina samy hafa, dia naneho fa ny Kristiana tsirairay, izay tena mitombo sy mivoatra amin'ny toetra ara-panahy, dia miraiki-po tanteraka amin'ny asan'ny Fiangonan'Andriamanitra, izay niantsoan'i Kristy velona ny mpanompony ho fitaovana. Noho izany, ny "asa", na "vokatra", dia ahitana ny anjarany amin'ny fanampiana ny fampielezana ny Filazantsaran'i Kristy ho an'izao tontolo izao ho vavolombelony (Mat. 24:14; 28: 19-20).
(Matio 24:14) « Ary hotorina amin'izao tontolo izao ity filazantsaran'ny fanjakana ity ho vavolombelona amin'ny firenena rehetra, dia vao ho tonga ny farany. »
(Matio 28:19) « koa mandehana ianareo, dia ataovy mpianatra ny firenena rehetra, manao batisa azy ho amin'ny anaran'ny Ray sy ny Zanaka ary ny Fanahy Masina » (Matio 28:20) « sady mampianatra azy hitandrina izay rehetra nandidiako anareo; ary, indro, Izaho momba anareo mandrakariva ambara-pahatongan'ny fahataperan'izao tontolo izao. »
4. Araka ny voalazan'ny Baiboly, iza no tsy maintsy tahafin’ny Kristiana notorontoronin’ny Fanahy? Efes. 4:15; 1 Jaona 2: 6; 1 Pet. 2:21.
(Efesiana 4:15) « fa mba hanaraka ny marina amin'ny fitiavana ka hitombo amin'ny ny zavatra rehetra ho amin'izay Loha, dia Kristy; »
(1 Jaona 2:6) « Izay* milaza fa mitoetra ao aminy izy, dia tsy maintsy mandeha toy izay nandehanany koa. [* Na: Izao no ahafantarantsika fa ao aminy isika: Izay etc] »
(1 Petera 2:21) « Fa ho amin'izany no niantsoana anareo; fa Kristy aza efa nijaly hamonjy anareo ka namela fianarana ho anareo, mba hanarahanareo ny diany; »
Inona no vokatra farany amin'ity fanorontoronana ara-panahy ity? Gal. 4:19; Efes. 4:13.
(Galatiana 4:19) « Anaka, izay aharariako indray amin'ny fiterahana mandra-paharin'i Kristy ao anatinareo. » è Ary ao anatintsika Jesosy Kristy.
(Efesiana 4:13) « mandra-pahatongantsika rehetra ho amin'ny firaisan'ny finoana sy ny fahalalana tsara ny Zanak'Andriamanitra, ka ho lehilahy lehibe, mahatratra ny ohatry ny halehiben'ny fahafenoan'i Kristy; » è Mahatratra ny ohatry ny fahafenoan’i Kristy.
5. "Miaina" ao amin'ny Kristiana notorontoronin’ny Fanahy ve i Kristy mba hanampy azy ireo hitombo ara-panahy? Kolosiana 1: 27-29; Gal. 2:20; Heb. 13: 20-21, manao hoe:
(Kolosiana 1:27) « izay efa tian'Andriamanitra ho nampahafantarina ny haren'ny voninahitr'ity zava-niafina ity any amin'ny jentilisa, dia Kristy ao anatinareo, Izay fanantenana ny voninahitra; » (Kolosiana 1:28) « Izy no torinay, ka samy anarinay sy ampianarinay amin'ny fahendrena rehetra ny olona rehetra, mba samy hatolotray ho tanteraka ao amin'i Kristy izy rehetra. » (Kolosiana 1:29) « Ary ny hahatanteraka izany no ikelezako aina koa sy iezahako fatratra araka ny fiàsan'ny herin'ilay miasa mahery ato anatiko. »
(Galatiana 2:20) « Voahombo miaraka amin'i Kristy amin'ny hazo fijaliana aho, ary tsy izaho intsony no velona, fa Kristy no velona ato anatiko; fa izay ivelomako ankehitriny eo amin'ny nofo dia ivelomako amin'ny finoana ny Zanak'Andriamanitra, Izay efa tia ahy ka nanolotra ny tenany hamonjy ahy. »
(Hebreo 13:20) « Ary Andriamanitry ny fiadanana, Izay nitondra an'i Jesosy Tompontsika, Mpiandry ondry lehibe, hiala amin'ny maty, mitondra ny ran'ny fanekena mandrakizay*, [* Na: Mpiandry ondry lehibe amin'ny ran'ny fanekena mandrakizay hiala amin'ny maty] » (Hebreo 13:21) « Izy anie hahatanteraka anareo amin'ny tsara* rehetra hanao ny sitrapony ka hiasa ao anatinareo** izay ankasitrahana eo imasony amin'ny alalan'i Jesosy Kristy; ho Azy anie ny voninahitra mandrakizay mandrakizay. Amena. [* Na: asa tsara] [**Na: (anatintsika)] »
Ahoana no fomba hitoeran'i Kristy ao aminy? Fil. 1:19; 2: 5; Rom. 8: 8-10.
(Filipiana 1:19) « Fa fantatro fa ho tonga famonjena ahy izany noho ny fangatahanareo sy ny fanomezana* ny Fanahin'i Jesosy Kristy, [* Na: fanomezan'] »
(Filipiana 2:5) « Aoka ho ao aminareo izao saina izao, izay tao amin'i Kristy Jesosy koa », Izay nanana ny endrik’Andriamanitra nefa nanetry tena ho olombelona, ary nanaiky hatramin’ny fahafatesana teo ambony hazofijaliana. (Filip 2:6-8)
(Romana 8:8) « Ary izay ao amin'ny nofo dia tsy mahay manao ny sitrapon'Andriamanitra. » (Romana 8:9) « Fa ianareo tsy ao amin'ny nofo, fa ao amin'ny Fanahy, raha ny Fanahin'Andriamanitra no mitoetra ao anatinareo. Fa raha misy kosa tsy manana ny Fanahin'i Kristy, dia tsy Azy izy. » (Romana 8:10) « Fa raha Kristy no mitoetra ao anatinareo, na dia maty ihany aza ny tena noho ny ota*, dia fiainana kosa ny fanahy noho ny fanamarinana. [*Na: na dia maty ny tena noho ny ota, fa] »
Fanamarihana: Tsy ny tenin'Andrimanitra ihany no tokony hiditra ao an-tsaintsika amin'ny alalàn'ny fandalinana ny Baiboly, fa tokony hiditra ao an-tsaintsika koa ny Fanahy. Tadidio fa ny Kristiana notorontoronin’ny Fanahy dia nandray ny Fanahy Masin'Andriamanitra, izay niray tamin'ny fanahy maha-olona ao an-tsainy. Izany no “mitsaika” ao anatintsika. Saingy io “tsaika ara-panahy” vaovao io dia tsy maintsy mitombo amin'ny lafiny ara-panahy, tahaka ny zaza ao am-kibon-dreny mitombo ara-batana, mandra-pahaterahany.
(Jaona 1:1) « Tamin'ny voalohany ny Teny, ary ny Teny tao amin'Andriamanitra, ary ny Teny dia Andriamanitra. »
(Matio 4:1) « Ary Jesosy dia nentin'ny Fanahy nankany an-efitra, mba halain'ny devoly* fanahy.[*Devoly = mpiampanga, na mpanendrikendrika] » (Matio 4:2) « Ary nifady hanina efa-polo andro sy efa-polo alina Izy, koa nony afaka izany, dia noana. » (Matio 4:3) « Dia nanatona ny mpaka fanahy ka nanao taminy hoe: Raha Zanak'Andriamanitra Hianao, dia teneno ho tonga mofo ireto vato ireto. » (Matio 4:4) « Fa Izy kosa namaly ka nanao hoe: Voasoratra hoe: Tsy mofo ihany no hiveloman'ny olona, fa ny teny rehetra izay aloaky ny vavan'Andriamanitra (Deo. 8. 3). » (Matio 4:5) « Ary ny devoly nitondra Azy nankany amin'ny tanàna masina ka nampitoetra Azy teo an-tampon ny tempoly, » (Matio 4:6) « dia nanao taminy hoe: Raha Zanak'Andriamanitra Hianao, mianjerà any ambany any; fa voasoratra hoe: Izy handidy ny anjeliny ny aminao; Ary eny an-tànany no hitondran'ireo Anao, fandrao ho tafintohina amin'ny vato ny tongotrao (Sal. 91. 11, 12). » (Matio 4:7) « Hoy Jesosy taminy: Voasoratra hoe koa: Aza maka fanahy an'i Jehovah Andriamanitrao (Deo. 6. 16). » (Matio 4:8) « Ary ny devoly nitondra Azy Indray nankany an-tendrombohitra avo dia avo ka naneho Azy ny fanjakana rehetra amin'izao tontolo izao mbamin'ny voninahiny, » (Matio 4:9) « dia nanao taminy hoe: Izao rehetra izao dia homeko Anao, raha hiankohoka eto anatrehako Hianao. » (Matio 4:10) « Fa hoy Jesosy taminy: Mandehana ianao, ry Satana: fa voasoratra hoe; Jehovah Andriamanitrao no hiankohofanao, ary Izy irery ihany no hotompoinao (Deo. 6. 13). »
Raha manana ny "Fanahin'i Kristy" isika - raha mitoetra ao anantitsika i Jesosy Kristy amin'ny alàlan'ny Fanahiny – dia manana hery hitombo ara-panahy isika rehefa mamela ny Fanahiny hitarika antsika amin'ny lalan'ny fahamarinana (Romana 8:14): « Fa izay tarihin'ny Fanahin'Andriamanitra no zanak'Andriamanitra. ». Amin'ny alàlan'ny Fanahiny dia afaka mankatò an'Andriamanitra isika, ary amin'izany dia mitombo amin’ny toetra masina sy marin'Andriamanitra.
(Matio 5:16) « Aoka hazava eo imason'ny olona toy izany koa ny fahazavanareo, mba hahitany ny asa soa ataonareo ka hankalazany ny Rainareo Izay any an-danitra. »
Ny teny hoe "feno ny Fanahy" (Efesiana 5:18) dia tsy midika hoe feno ara-pihetseham-po, izay avy amin'ny nofo. Ny tian'i Paoly holazaina dia tokony feno ny fanahin'Andriamanitra isika, izay azo amin'ny alalàn'i Jesosy Kristy amin'ny maha-Mpisoronabe azy.
(Efesiana 5:18) « Ary aza ho mamon-divay ianareo, fa amin'izany dia misy fanaranam-po amin'ny ratsy, fa aoka hofenoina ny Fanahy, »
Mariho ny fomba nanazavan'i Paoly izany rehefa niresaka tamin'ireo Kristiana notorontoronin’ny Fanahy ao amin'ny Fiangonan'Andriamanitra tany Roma izy: « Fa ianareo tsy ao amin'ny nofo, fa ao amin'ny Fanahy, raha ny Fanahin'Andriamanitra no mitoetra ao anatinareo. » [Fanahy Masina avy amin'Andriamanitra Ray, izay mampita ny toetrany]. Nefa diniho izay nambaran'i Paoly hoe: "Fa raha misy kosa tsy manana ny Fanahin'i Kristy, dia tsy Azy izy" (Romana 8: 9). Tsy an'i Kristy izy - tsy tena Kristiana!