SEKOLY SABATA
Dr. Daniel Rakotondravony, Fiangonan'Andriamanitra MirayNY FANAHY MASINA SY NY FIANGONAN'ANDRIAMANITRA
1. Raha vao nibebaka marina sy vita batisa ary notorontoronin’ny Fanahy Masin’Andriamanitra isika, dia tonga momba ny “tena” iray ve? 1 Kor. 12:13.
(1 Korintiana 12:13) « Fa Fanahy iray ihany no nanaovam-batisa antsika rehetra ho tena iray, na Jiosy an jentilisa*, na andevo na tsy andevo; ary isika rehetra dia efa nampisotroina ny Fanahy iray. [* Gr. Grika] »
Inona no tena resahin'i Paoly? Andininy 27; Efes. 1: 22-23; Kol. 1:18.
(1 Korintiana 12:27) « Ary ianareo no tenan'i Kristy, ka samy momba ny tenany avokoa araka ny anjaranareo avy. »
(Efesiana 1:22) « dia nampanaiky ny zavatra rehetra ho eo ambanin'ny tongony Izy ka nanao Azy ho Lohany manapaka ny zavatra rehetra ho an'ny fiangonana*, [* Gr. eklesia] » (Efesiana 1:23) « izay tenany, dia ny fahafenoan'izay mameno izao zavatra rehetra izao amin'ny rehetra. »
(Kolosiana 1:18) « Ary Izy no Lohan'ny tena, dia ny fiangonana*; Izy no voalohany, dia ny Lahimatoa tamin'ny maty, mba ho Lohany amin'ny zavatra rehetra Izy. [* Gr. eklesia] »
Noho izany, ny firotsahana ho mpikambanana amin’ny vondrona izay miantso ny tenany ho fiangonana – isoratan’ny anaranao ao amin'ny lisitry ny mpikambana ao aminy - dia tsy mahatonga anao ho mpikambana amin'ny Fiangonana naorin’i Jesosy. Tsy mahatonga antsika ho tenan'i Kristy ny fanapahantsika hevitra hanatrika fotoam-pivavahana.
Ny mamaritra hoe “mpikambana ao amin'ny tena Fiangonan'Andriamanitra ny olona iray na tsia” dia ny “fonorontoronan’ny Fanahy Masina”. Ireo izay tsy nandray ny Fanahin'Andriamanitra dia tsy ampahany amin'ny tenan'i Kristy marina - ary tsy tena Kristiana! (Romana 8: 9.)
(Romana 8:9) « Fa ianareo tsy ao amin'ny nofo, fa ao amin'ny Fanahy, raha ny Fanahin'Andriamanitra no mitoetra ao anatinareo. Fa raha misy kosa tsy manana ny Fanahin'i Kristy, dia tsy Azy izy. »
Ary mampanantena Andriamanitra fa tsy hanome ny Fanahiny afa-tsy ireo izay tena mibebaka amin'ny ota ary atao batisa (Asa. 2:38; 5:32).
(Asan'ny Apostoly 2:38) « Ary hoy Petera taminy: Mibebaha, ary aoka samy hatao batisa amin'ny anaran'i Jesosy Kristy ianareo rehetra mba hahazo famelana ny helokareo; ary ianareo handray ny fanomezana, dia ny Fanahy Masina; »
(Asan'ny Apostoly 5:32) « Ary izahay dia vavolombelon'izany zavatra izany, ary ny Fanahy Masina koa, Izay efa nomen'Andriamanitra ny manaiky Azy. »
Saingy rehefa vita batisa sy notorontoronin’ny Fanahin'Andriamanitra isika, dia inona no manaraka?
2. Inona no nanirahan'i Kristy hataon’ireo minisitra napetrany ao amin'ny Fiangonany? Mat. 28: 19-20; Jaona 21: 15-17; 1Pet. 5: 1-3.
(Matio 28:19) « koa mandehana ianareo, dia ataovy mpianatra ny firenena rehetra, manao batisa azy ho amin'ny anaran'ny Ray sy ny Zanaka ary ny Fanahy Masina » (Matio 28:20) « sady mampianatra azy hitandrina izay rehetra nandidiako anareo; ary, indro, Izaho momba anareo mandrakariva ambara-pahatongan'ny fahataperan'izao tontolo izao. »
(Jaona 21:15) « Ary rehefa nisakafo izy, dia hoy Jesosy tamin'i Simona Petera: Simona, zanak'i Jaona, moa ny fitiavanao Ahy mihoatra noho ny fitiavan'ireto? Hoy izy taminy: Eny, Tompoko; Hianao mahalala fa tia Anao aho. Dia hoy Izy taminy: Fahano ary ny ondrikeliko. » (Jaona 21:16) « Hoy indray Izy taminy fanindroany: Simona, zanak'i Jaona, moa tia Ahy va ianao? Dia hoy izy taminy: Eny, Tompoko; Hianao mahalala fa tia Anao aho. Dia hoy Izy taminy: Andraso ary ny ondriko. » (Jaona 21:17) « Hoy Izy fanintelony: Simona, zanak'i Jaona, moa tia Ahy va ianao? Dia nalahelo Petera, satria Izy nanao intelo taminy hoe: Moa tia Ahy va ianao? Ka hoy izy taminy: Tompoko, Hianao mahalala ny zavatra rehetra; fantatrao fa tia Anao aho. Hoy Jesosy taminy: Fahano ary ny ondriko. »
[Fananarana ny loholona mba ho malemy fanahy sy ho mahatoky, ary fananarana ny olona rehetra mba hanetry tena sy hitandrina. Vavaka farany sy fanaovam-beloma]
(1 Petera 5:1) « Koa ny amin'ny loholona* izay eo aminareo, izaho, izay naman ny loholona* sy vavolombelon'ny fijalian'i Kristy ary mpiombona ny voninahitra efa haseho koa, dia mananatra azy hoe: [* Gr. presbytera] » (1 Petera 5:2) « Andraso ny ondrin'Andriamanitra izay eo aminareo*, mitandrina azy tsy an-tery, fa amin'ny sitrapo,[araka an'Andriamanitra]; tsy amin'ny fitiavana harena maloto, fa amin'ny zotom-panahy; *[ Na: izay andraikitrareo] » (1 Petera 5:3) « tsy ho mpanjakazaka, amin'ny anjara-fiandrasana, fa ho fianaran'ny ondry. »
(Jereo ny teny telo farany amin'ny tsirairay amin'ireo andininy telo ao amin'ny Jaona 21 voalaza etsy ambony.) Inona no antony anaovan'ny minisitra ny "famahanana" ny ondrin'i Kristy? Efes. 4: 11-15.
(Efesiana 4:11) « Ary Izy no nanome ny sasany ho Apostoly, ary ny sasany ho mpaminany, ary ny sasany ho evanjelista, ary ny sasany ho mpiandry sy mpampianatra, » (Efesiana 4:12) « ho fanatanterahana ny olona masina, ho amin'ny asan'ny fanompoana amin'ny fiangonana*, ho amin'ny fampandrosoana ny tenan'i Kristy, [* Gr. eklesia] » (Efesiana 4:13) « mandra-pahatongantsika rehetra ho amin'ny firaisan'ny finoana sy ny fahalalana tsara ny Zanak'Andriamanitra, ka ho lehilahy lehibe, mahatratra ny ohatry ny halehiben'ny fahafenoan'i Kristy; » (Efesiana 4:14) « mba tsy ho zaza intsony isika, ka ahilangilana sy ampitambolimbolenin'ny rivotry ny fampianarana samy hafa rehetra amin'ny saim-petsy ataon'ny olona sy ny fihendreny hahatanteraka ny hevitry ny famitahana; » (Efesiana 4:15) « fa mba hanaraka ny marina amin'ny fitiavana ka hitombo amin'ny ny zavatra rehetra ho amin'izay Loha, dia Kristy; »
Fanamarihana: Andriamanitra dia nametraka ireo olom-boafidiny sy voantsony ao amin'ny Fiangonany mba "hamahana ny andian'ondry" mba hahafahan'izy ireo mitombo ara-panahy - "Ho fahatanterahan’ny olona masina, ho amin'ny asan'ny fanompoana, ho fanamafisana ny tenan'i Kristy [Fiangonan'Andriamanitra]: Mandra-pahatongantsika rehetra amin'ny firaisan'ny finoana sy ny fahalalana ny Zanak'Andriamanitra, ho olona tonga lafatra [matotra tanteraka, feno amin’ny fitomboana], mandra-pahatongan'ny ohatry ny halehiben’ny fahafenoan'i Kristy "(Efes. 4: 12-13, jereo etsy ambony).
Ny Galatiana 4:26 dia milaza hoe: « Fa Jerosalema any ambony kosa, izay renintsika …. ». Ara-panahy, ny Fiangonan'Andriamanitra dia "renin’" izay rehetra notorontoronin’ny Fanahiny Masina. I Kristy dia nanome adidy ho an’ireo minisitra hitarika sy hampianatra ary hanoro hevitra ny mpikamban'ny Fiangonana (Heb. 13:17).
(Hebreo 13:17) « Manekè ny mpitondra anareo, ka manoava azy; fa izy miambina ny fanahinareo araka izay tokony hataon'ny olona mbola hampamoahina, mba hanaovany izany amin'ny fifaliana, fa tsy amin'ny fisentoana; fa tsy hahasoa anareo izany. »
Ary raha mitondra ny zaza tsy mbola teraka ao an-kibony ny renin'olombelona, dia afaka miaro azy amin'ny loza ara-batana. Toy izany koa, ny Fiangonan'Andriamanitra dia miaro ny zanak'Andriamanitra torontoronina avy amin’ny Fanahiny Masina amin'ny fahavoazana ara-panahy, toy ny fampianaran-diso ataon'ny minisitra sy mpaminany sandoka.
Amin'ny alàlan'ny fizotr’ity "famahanana" ity, ankoatry ny fandalinana Baiboly sy ny vavaka manokana ataon'ny tsirairay, ny Kristiana tsirairay dia mahazo ny sakafo ara-panahy ilaina amin'ny fitomboana ara-panahy, mandra-pahatongan’ny fahaterahany amin'ny fiavian'i Kristy fanindroany, ho mpikambana ao amin'ny Fianakavian'Andriamanitra feno fifaliana sy manjaka amin’izao rehetra izao!
FITADIAVANA NY FIANGONANA MARINA
Hoy Jesosy: "Ambonin'ity vatolampy ity no haoriko ny fiangonako" (Mat. 16:18). Ao amin'ny Baiboly dia eo no isehoan'ny teny hoe "Fiangonana naorin’Andriamanitra" voalohany. Raha te hamaly ny fanontaniana manao hoe isika: “Aiza no Misy ny Fiangonana Marina?” dia tokony hanomboka amin'ny famaritana ny atao hoe Fiangonana aloha. Inona marina no naorin'i Jesosy? Fa maninona no tsy maintsy nisy Fiangonana? Iray ihany ve no naoriny sa maromaro? Manana antokom-pivavahana maro ve ity fiangonana ity, sekta maro? Tsy Fiangonana iray ve no naorin’i Jesosy - izay mbola misy ankehitriny? Ary inona no andraikitry ny fiangonana naoriny?
Ankehitriny, inona no andraikitry ny Fiangonana? Fa maninona ireo mpikambana ao aminy no nantsoina tsy ho anisan'izao tontolo izao? Ny valin'ity fanontaniana ity dia hita ao amin'ireto fanontaniana manaraka ireto: Inona no ratsy eto amin'ity tontolo ity? Niorina tamin'ny fototra tsy nety izy io. Feno haratsiam-panahy io ara-bakiteny io, ary tsy nitondra afa-tsy fijaliana, alahelo, fahasosorana ary fahafatesana.
Vao hitantsika izao fa ny Fiangonan'Andriamanitra marina dia ny vatan'ny mpino izay manana ny Fanahy Masina. Noho izany, ny Fiangonana dia olona tarihin’ny Fanahy Masina. Ary Jesosy Kristy no lohany.
Ny Fiangonana marina dia mahatakatra ny Planin'Andriamanitra momba ny famonjena, ary manatanteraka ny asa nanirahan'i Kristy hitory ny Filazantsara marina ho vavolombelona amin'ny firenena rehetra. Ary araky ny nianarantsika ihany koa, ny Fiangonana dia mikolokolo ny zanak'Andriamanitra izay notorontoronin’ny Fanahy Masina ao anatiny.
Ny fahafantarana an’izany dia mahatonga zava-dehibe indrindra ny fahitanao izay tenan'i Kristy marina. Saingy ahoana no fomba hitadiavana ny Fiangonan'Andriamanitra sy ny minisitra ao aminy? Aiza ny Fiangonana iasan’Andriamanitra ankehitriny?
1. Moa ve izay minisitra sy ny fiangonana rehetra mihambo ho Kristiana dia ao amin'ny Fiangonan'Andriamanitra marina, sa misy fiangonana sandoka? 2Kor 11: 13-15.
(2 Korintiana 11:13) « Fa Apostoly sandoka izy ireny, mpiasa mamitaka, ka dia mampiova ny endriny ho tahaka ny Apostolin'i Kristy. » (2 Korintiana 11:14) « Ary tsy mahagaga izany, fa Satana aza mampiova ny endriny ho tahaka ny anjelin'ny mazava. » (2 Korintiana 11:15) « Koa tsy zavatra lehibe tsy akory, raha ny mpanompony koa no mba mampiova ny endriny ho tahaka ny mpanompon'ny fahamarinana; nefa ny farany ho araka ny asany ihany. »
Fanamarihana: Satria ireo rehetra izay mitonona ho mpanompon'Andriamanitra dia tsy izay lazainy akory, inona ary, no sasany amin'ireo famantarana hitarika antsika ho amin'ny ministr’Andriamanitra marina sy ny tenan'i Kristy marina?
2. Moa ve ny Fiangonan'Andriamanitra marina tokony hanaraka an'i Kristy amin'ny fanarahana ny lalàn'Andriamanitra? Mat. 5:17; 19: 17-19; 28: 19-20; Jaona 15:10.
(Matio 5:17) « Aza ataonareo fa tonga Aho handrava ny lalàna na ny mpaminany; tsy tonga Aho handrava, fa hanatanteraka. »
(Matio 19:17) « Fa hoy Jesosy taminy: Nahoana Aho no anontanianao ny amin'izay tsara? Iray no tsara*; fa raha te-hiditra any amin'ny fiainana ianao, tandremo ny didy.[*Na: (Nahoana Aho no ataonao tsara? Tsy misy tsara afa-tsy iray ihany dia Andriamanitra.)] » (Matio 19:18) « Hoy ralehilahy taminy: Inona avy moa? Dia hoy Jesosy: Ny hoe: Aza mamono olona, Aza mijangajanga, Aza mangalatra, Aza mety ho vavolombelona mandainga, » (Matio 19:19) « Manajà ny rainao sy ny reninao (Eks. 20:12-16), ary: Tiava ny namanao tahaka ny tenanao (Lev. 19:18). »
(Matio 28:19) « koa mandehana ianareo, dia ataovy mpianatra ny firenena rehetra, manao batisa azy ho amin'ny anaran'ny Ray sy ny Zanaka ary ny Fanahy Masina » (Matio 28:20) « sady mampianatra azy hitandrina izay rehetra nandidiako anareo; ary, indro, Izaho momba anareo mandrakariva ambara-pahatongan'ny fahataperan'izao tontolo izao. »
(Jaona 15:10) « Raha mitandrina ny didiko ianareo, dia hitoetra amin'ny fitiavako, tahaka ny nitandremako ny didin'ny Raiko sy ny itoerako amin'ny fitiavany. »
Hiezaka mafy hitandrina ara-bakiteny ny didin'Andriamanitra rehetra ve io Fiangonana io? Jaona 14:15; Apok. 3: 7-8; 12:17.
(Jaona 14:15) « Raha tia Ahy ianareo, dia hitandrina ny didiko. »
(Apokalypsy 3:7) « [Filadelfia] Ary soraty ho amin'ny anjelin'ny fiangonana* any Filadelfia: Izao no lazain'izay masina, Izay marina, Izay manana ny fanalahidin'i Davida, Izay mamoha ka tsy hisy hanidy, ary manidy ka tsy misy mamoha: [* Gr. eklesia] » (Apokalypsy 3:8) « Fantatro ny asanao (indro, efa nasiako varavarana mivoha eo anatrehanao, ka tsy misy maharindrina azy), fa manana hery kely ihany ianao ka nitandrina* ny teniko ary tsy mba nandà ny anarako. [* Na: fa na dia kely aza ny herinao, dia efa nitandrina, etc] »
(Apokalypsy 12:17) « Dia tezitra tamin'ilay vehivavy ny dragona ka lasa nandeha hiady tamin'ny zanany sisa, izay mitandrina ny didin'Andriamanitra sy mitana ny filazana an'i Jesosy. Ary nitsangana teo ambonin'ny fasiky ny ranomasina izy. »
Ny Toko 12 amin’ny Apokalypsy dia manondro ny Fiangonan'Andriamanitra marina ho vehivavy.
Fanamarihana: Ny Fiangonana marina dia mitazona ny lalàn'Andriamanitra. Fantany fa Andriamanitra dia nametraka Lalàna izay hitondra ny zavatra tsara rehetra ho antsika, raha mankatò azy isika. Ny Fiangonan'Andriamanitra dia sahy manambara fa tsy foana ny lalàn’Andriamanitra, fa nohamafisin'i Kristy, (Isa. 42:21) mandrakotra ny lafiny rehetra amin'ny fiainan'ny zanak'olombelona.
(Isaia 42:21) « Sitrak'i Jehovah noho ny fahamarinany ny hahalehibe ny lalàna sy ny hahabe voninahitra azy. »
Ny Fiangonana marina dia mahatakatra fa « Fanilon'ny tongotro sy fanazavana ny lalako ny teninao. » (Salamo 119:105). Ekeny fa ny Lalàn'Andriamanitra dia iray amin'ireo fanomezany lehibe indrindra ho an'ny olombelona.
3. Moa ve ny Fiangonan'Andriamanitra manandrana manambany na manamaivana ny Baiboly, ka miankinan-doha amin'ny lovatsofin'olombelona sy ny fiheverany momba ireo foto-pampianarany lehibe? Sa kosa azony tsara hoe ny Baiboly manontolo, dia ny Testamenta Taloha sy Vaovao — no tena tenin'Andriamanitra? Lioka 4: 4; 2Tim. 3: 15-17; 4: 2; Isa. 8:20.
(Lioka 4:4) « Fa Jesosy namaly azy ka nanao hoe: Voasoratra hoe: Tsy mofo ihany no hiveloman'ny olona, fa izay rehetra aloaky ny vavan’i Jehovah no iveloman’ny olona (Deo. 8. 3). »
(2 Timoty 3:15) « fa hatry ny fony vao zaza ianao dia efa nahalala ny Soratra Masina, izay mampahahendry anao ho amin'ny famonjena amin'ny finoana izay ao amin'i Kristy Jesosy. » (2 Timoty 3:16) « Izay soratra rehetra nomen'ny tsindrimandrin'Andriamanitra dia mahasoa koa ho fampianarana, ho fandresen-dahatra, ho fanitsiana izay diso, ho fitaizana amin'ny fahamarinana, » (2 Timoty 3:17) « mba ho tanteraka ny olon'Andriamanitra, ho vonona tsara ho amin'ny asa tsara rehetra. »
(2 Timoty 4:2) « mitoria ny teny, mazotoa, na amin'ny fotoana, na tsy amin'ny fotoana, mandrese lahatra, mamporisiha, mananara mafy amin'ny fahari-po sy ny fampianarana rehetra. »
(Isaia 8:20) « Ho amin'ny lalàna sy ny teni-vavolombelona ihany! Raha tsy miteny araka izany teny izany izy, dia olona izay tsy hiposahan'ny fahazavan'ny maraina*.[Na: Eny, izany no holazain'ny olona izay tsy iposahan'ny fahazavan'ny maraina] »
Fanamarihana: Ny hany "Soratra Masina" azon'i Timoty dia ny bokin'ny Testamenta Taloha. Mino ny Fiangonan'Andriamanitra fa nomen'ny tsindrimandrin'Andriamanitra daholo ny Baiboly manontolo. Ny Fiangonana marina dia mampiasa ny Testamenta Taloha, toa an'i Kristy sy ny Apostoly, ary mino fa io koa dia ampahany amin'ny Tenin'Andriamanitra ho antsika ankehitriny. (Mazava ho azy fa tsy maintsy takatra amin'ny fahazavan'ny Testamenta Vaovao ny Testamenta Taloha.)
NY FANAHY MASINA SY IANAO
Ankehitriny dia andao hojerena ny momba anao manokana. Araka ny efa fantatry ny maro, dia misy amin’ny faritra betsaka eran’izao tontolo izao ny minisitr’Andriamaitra. Koa raha tena te hatao batisa ianao ka handray ny Fanahy Masin’Andriamanitra - na raha manana fanontaniana tokony hovaliana dia manorata ary ampahafantaro anay fa te hiresaka amin'ny minisitry ny Fiangonan’Andriamanitra ianao.
Ataovy azo antoka tsara fa vitanao ny lesona “Nahoana Ianao No Mila Ny fanahy Masina”, omen’ny Fiangonan’Andriamanitra Miray. Ary aza hadino ny manonona izany rehefa miantso na manoratra.
Rehefa avy nahazo ny Fanahy Masin’Andriamanitra ianao dia hanomboka hahatsapa fiovana mahery vaika ao an-tsainao - eo amin’ny fihetsikao sy ny fomba fijerinao ny fiainana. Ary rehefa mitombo ara-panahy ianao dia hahita fahatsarana mitombo hatrany amin'ny toetran'Andriamanitra, fahatsapana vaovao amin'ny fahatakaranao ny Lalàn’Andriamanitra, toe-tsaina vaovao momba ny fiainana sy fahatsapana tena mahafinaritra ny ho avy!