MANDROSO HO ANY AMIN’NY FANJAKAN’ANDRIAMANITRA
NY HERIN’NY FANAHY MASINA
AZO TANTERAHINA ANKEHITRINY NY FAMORONANA ANTSIKA ARA-PANAHY
TENIN’ANDIAMANITRA
Joba 19:25-29
Jaona 17:20-26
1 Jaona 3:1-9
Joba 19:25-29
[Ny teny navalin’i Joba]
(Joba 19:25) « Kanefa raha izaho, dia fantatro fa velona ny Mpanavotra* ahy, ka hitsangana any am-parany** eo ambonin'ny vovoka Izy.[*Heb. Goela][**Na: ho farany] » (Joba 19:26) « Ary rehefa levona ny hoditro, izao simba izao, sady afaka amin'ny nofoko aho, dia hahita an'Andriamanitra*;[Na: Dia hahita an'Andriamanitra amin'ny nofoko aho] » (Joba 19:27) « Eny, izaho no hahita Azy, ary ny masoko no hijery, fa tsy olon-kafa. Efa matim-paniriana ny saiko* ato anatiko.[Heb. voako] » (Joba 19:28) « Raha hoy ianareo: Andeha hanenjika azy fatratra isika. Fa hita ao anatiny* ny fototry ny mahameloka azy**.[*Heb. anatiko][**Heb. ahy] » (Joba 19:29) « Dia matahora ny sabatra ianareo; Fa ny fahatezerana dia heloka mendrika ny hovalian-tsabatra, mba ho fantatrareo fa misy fitsarana. »
Jaona 17:20-26
[Ny vavaka nataon’i Jesosy ho an’ny mpianany]
(Jaona 17:20) « Nefa tsy ho an'ireto ihany no angatahako, fa ho an'izay mino Ahy koa noho ny teniny; » (Jaona 17:21) « mba ho iray ihany izy rehetra, tahaka Anao Ray ato amiko, ary Izaho koa ao aminao, mba ho ao amintsika koa izy; mba hinoan'izao tontolo izao fa Hianao no naniraka Ahy. » (Jaona 17:22) « Ary nomeko azy ny voninahitra izay nomenao Ahy, mba ho iray izy, tahaka ny mahiray Antsika: » (Jaona 17:23) « Izaho ao aminy, ary Hianao ato amiko, mba ho tanteraka ho iray izy, mba ho fantatr'izao tontolo izao fa Hianao efa naniraka Ahy sady efa tia azy tahaka ny nitiavanao Ahy. » (Jaona 17:24) « Ray ô, tiako mba ho any amiko amin'izay itoerako ireo izay nomenao Ahy, mba hahita ny voninahitro nomenao Ahy izy; fa efa tia Ahy Hianao, fony tsy mbola ary ny fanorenan'izao tontolo izao. » (Jaona 17:25) « Ray marina ô, tsy nahalala Anao izao tontolo izao; fa Izaho nahalala Anao, ary ireto efa mahalala fa Hianao no naniraka Ahy. » (Jaona 17:26) « Ary efa nampahafantariko azy ny anaranao, ary mbola hampahafantariko ihany, mba ho ao aminy ny fitiavana izay nitiavanao Ahy, ary Izaho koa ho ao aminy. »
1 Jaona 3:1-9
[Ny fahazotoan'ny zanak'Andriamanitra hanao ny sitrapon'ny Rainy sy hifankatia amin'ny namany, ary ny fahatokiana ananany]
(1 Jaona 3:1) « Endrey! manao ahoana ny fitiavana nasehon*'ny Ray ho antsika, dia ny niantsoana antsika hoe zanak'Andriamanitra, sady izany tokoa isika! Koa noho izany dia tsy mahalala antsika izao tontolo izao, satria tsy nahalala Ary izy. [* Gr. nomen'] » (1 Jaona 3:2) « Ry malala, ankehitriny aza dia zanak'Andriamanitra isika, nefa tsy mbola naseho izay ho toetsika rahatrizay. Fantatsika fa raha hiseho Izy, dia ho tahaka Azy isika, fa ho hitantsika Izy, dia izay tena endriny tokoa. » (1 Jaona 3:3) « Ary izay rehetra manana izany fanantenana miorina aminy izany dia manadio ny tenany mba hadio tahaka Azy. » (1 Jaona 3:4) « Izay rehetra manota no mandika ny lalàna; fa ny ota no fandikana ny lalàna. » (1 Jaona 3:5) « Ary fantatrareo fa Izy no naseho hanaisotra* ny ota; ary tsy mba misy ota ao aminy. [* Na: hitondra] » (1 Jaona 3:6) « Izay rehetra mitoetra ao aminy dia tsy manota; izay rehetra manota dia tsy nahita na nahalala Azy. » (1 Jaona 3:7) « Anaka, aza avela hisy hamitaka anareo: izay manao ny marina no marina; eny, marina tahaka Azy. » (1 Jaona 3:8) « Izay manota dia avy amin'ny devoly, satria ny devoly manota hatramin'ny voalohany. Izao no nisehoan'ny Zanak'Andriamanitra, dia ny handrava ny asan'ny devoly. » (1 Jaona 3:9) « Izay rehetra naterak'Andriamanitra no tsy manota, satria ny voany mitoetra ao anatiny, ary tsy mahay manota izy, satria naretak'Andriamanitra. »
TORITENY
Joba 19:25-29
Joba 19:25 FANATRO FA VELONA NY MPANAVOTRA AHY
Nifikitra tamin’Andriamanitra tamim-pinoana lehibe sady nino ny hamalian’Andriamanitra soa azy any am-parany i Joba raha mby teo anivon’ny fahoriana sy ny fahadisoam-panantenana. Noheverin’i Joba ho toy ny “Mpanavotra” na “Mpanampy” azy Andriamanitra. Tamin’ny andron’ny Baiboly dia “Mpanavotra” no niantsoana ny havana izay manam-pitiavana lehibe ka tonga mba hiaro, hisolo vava, hanampy amin’ny ady, ary hitondra famaliana soa ho an’ilay havany tra-pahoriana.
Joba 19:25 KA HITSANGANA ANY AM-PARANY EO AMBONIN’NY VOVOKA IZY
Tamin’ny tsindrimandry avy amin’ny Fanahy Masina no nilazan’i Joba tamin’ny fanamarinana nataony fa Jesosy Kristy no ilay Mpanavotra.
ü Tonga hanavotra ireo olony amin’ny fahotana sy ny fanamelohana Jesosy Kristy (Romana 3:24; Galatiana 3:13; 4:5; Efesiana 1:7; Titosy 2:14):
(Romana 3:24) « nefa hamarinina maimaimpoana amin'ny fahasoavany izy noho ny fanavotana izay ao amin'i Kristy Jesosy, »
(Galatiana 3:13) « Kristy nanavotra anay tamin'ny ozon'ny lalàna, satria tonga voaozona hamonjy anay Izy; fa voasoratra hoe : Voaozona izay rehetra mihantona amin'ny hazo (Deo. 21. 23), » (Galatiana 4:5) « hanavotany izay ambanin'ny lalàna, mba handraisantsika ny fananganan'anaka. »
(Efesiana 1:7) « Izy no ananantsika fanavotana amin'ny ràny, dia ny famelana ny fahadisoantsika, araka ny haren'ny fahasoavany, »
(Titosy 2:14) « Izay nanolotra ny tenany hamonjy antsika, mba hanavotany antsika ho afaka amin'ny ota rehetra, sy hanadiovany izay olona ho an'ny tenany, sady ho mazoto indrindra amin'ny asa tsara izany. »
ü Tonga koa Izy hanafaka azy ireo amin’ny tahotra ny fahafatesana (Hebreo 2:14-15); Romana 8:23):
(Hebreo 2:14) « Koa satria manana nofo aman-drà ny zaza, dia mba nandray izany koa Izy, mba handringanany amin'ny fahafatesana ilay manana ny herin'ny fahafatesana, dia ny devoly, » (Hebreo 2:15) « ary mba hanafahany izay rehetra nandany ny fiainany rehetra tamin'ny fahandevozana noho ny tahotra ny fahafatesana. »
(Romana 8:23) « ary tsy izany ihany, fa isika koa, na dia manana ny voaloham-bokatry ny Fanahy aza, isika aza dia misento ato anatintsika, miandry ny fananganan'anaka, dia ny fanavotana ny tenantsika. »
ü Tonga koa Izy hanome azy ireo fiainana mandrakizay (Jaona 3:16; Romana 6:23):
(Jaona 3:16) « Fa toy izao no nitiavan'Andriamanitra izao tontolo izao : nomeny ny Zanani-lahy Tokana , mba tsy ho very izay rehetra mino Azy , fa hanana fiainana mandrakizay . »
(Romana 6:23) « Fa fahafatesana no tambin'ny ota; ary fiainana mandrakizay no fanomezam-pahasoavana avy amin'Andriamanitra ao amin'i Kristy Jesosy Tompontsika. »
ü Tonga koa Izy hanafaka azy ireo amin’ny fahatezerana ho avy (1 Tesaloiniana 1:10):
(1 Tesaloniana 1:10) « ary mba hiandry ny Zanany avy any an-danitra, Izay natsangany tamin'ny maty, dia Jesosy, izay Mpanafaka antsika amin'ny fahatezerana ho avy. »
ü Ary tonga koa Izy hitondra famaliana an-karihary ho azy ireo (ampit Apok 19:11-21; 20:1-6). Naminany ny fomba fisehoan’ity Mpanavotra avy any ambony hita maso ity i Joba eto.
[Ny amin'ilay nitaingina soavaly fotsy sy ny miaramilany, izay naharesy ny bibi-dia sy ny mpaminany sandoka] (Apokalypsy 19:11) « Ary nahita ny lanitra voasokatra aho, ka, indro, nisy soavaly fotsy; ary Izay nitaingina azy dia atao hoe Mahatoky sy Marina, ary amin'ny fahamarinana no itsarany sy iadiany. » (Apokalypsy 19:12) « Ary ny masony dia lelafo, ary tamin'ny lohany nisy diadema maro; ary Izy manana anarana voasoratra, izay tsy misy mahalala akory afa-tsy ny tenany ihany. » (Apokalypsy 19:13) « Ary miakanjo akanjo voafafy rà* Izy; ary ny anarany atsoina hoe Ny Tenin'Andriamanitra. » (Apokalypsy 19:14) « Ary ny antokon'ny miaramila any an-danitra dia nanaraka Ary, samy nitaingina soavaly fotsy sy niakanjo rongony madinika sady fotsy no madio. » (Apokalypsy 19:15) « Ary misy sabatra maranitra mivoaka avy amin'ny vavany mba hamelenany ny firenena; ary Izy hanapaka azy amin'ny tehim-by; ary Izy no manitsaka ny famiazana ny divain'ny firehetan'ny fahatezeran'Andriamanitra Tsitoha. » (Apokalypsy 19:16) « Ary manana anarana voasoratra amin'ny lambany sy ny feny Izy nanao hoe: MPANJAKAN'NY MPANJAKA SY TOMPON'NY TOMPO. » (Apokalypsy 19:17) « Ary hitako fa, indro, nisy anjely anankiray koa nitsangana teo amin'ny masoandro, ary niantso tamin'ny feo mahery izy ka nanao tamin'ny voro-manidina rehetra teo afovoan'ny habakabaka hoe: Avia, ka miangòna ho amin'ny fanasana lehiben'Andriamanitra, » (Apokalypsy 19:18) « mba hihinananareo ny nofon'ny mpanjaka sy ny nofon'ny mpifehy arivo sy ny nofon'ny mahery sy ny nofon'ny soavaly mbamin'izay mitaingina azy ary ny nofon'ny olona rehetra, na andevo na tsy andevo, na kely na lehibe. » (Apokalypsy 19:19) « Ary hitako ilay bibi-dia sy ny mpanjakan'ny tany mbamin'ny miaramilany tafangona mba hiady amin'ilay mitaingina ny soavaly sy amin'ny miaramilany. » (Apokalypsy 19:20) « Ary nosamborina ilay bibi-dia mbamin'ny mpaminany sandoka, dia ilay nanao ny famantarana teo anatrehany, izay nentiny namitaka ny efa nandray ny mariky ny bibi-dia sady miankohoka eo anoloan'ny sariny; ary dia natsipy velona ho any amin'ny farihy afo mirehitra solifara izy roroa. » (Apokalypsy 19:21) « Ary ny olona sisa dia matin'ny sabatra mivoaka avy amin'ny vavan'ilay mitaingina ny soavaly; ary ny vorona rehetra dia voky ny nofony. »
[Ny amin'ny namatorana an'i Satana, sy ny amin'ny fitsanganana voalohany, ary ny arivo taona] (Apokalypsy 20:1) « Ary hitako fa, indro, nisy anjely nidina avy tany an-danitra, nanana ny fanalahidin'ny lavaka tsy hita noanoa sy gadra lehibe eny an-tànany; » (Apokalypsy 20:2) « dia nisambotra ilay dragona izy (dia ilay menarana ela, ny devoly sy Satana izany) ka namatotra ary arivo taona, » (Apokalypsy 20:3) « dia nanipy azy ho amin'ny lavaka tsy hita noanoa ka nanidy izany, dia nanisy tombo-kase teo amboniny, mba tsy hamitahany ny firenena maro intsony mandra-pahatapitry ny arivo taona; ary rehefa afaka izany, dia tsy maintsy hovahana kelikely aloha izy. » (Apokalypsy 20:4) « Ary nahita seza fiandrianana maro aho, ary nisy nipetraka teo amboniny, ary nomena fahefana hitsara izy; ary hitako koa ny fanahin'izay notapahin-doha noho ny filazana an'i Jesosy sy ny tenin'Andriamanitra sy izay rehetra tsy niankohoka teo anoloan'ny bibi-dia na teo anoloan'ny sariny ary tsy nandray ny marika ho eo amin'ny handriny na ho eo amin'ny tànany; ary velona izy ka niara-nanjaka tamin'i Kristy arivo taona. » (Apokalypsy 20:5) « Fa ny sisa amin'ny maty dia tsy mbola velona mandra-pahatapitry ny arivo taona. Izany no fitsanganana voalohany. » (Apokalypsy 20:6) « Sambatra sy masina izay manana anjara amin'ny fitsanganana voalohany; ireo tsy mba ananan'ny fahafatesana faharoa fahefana, fa ho mpisoron'Andriamanitra sy Kristy ireo ka hiara-manjaka aminy arivo taona. »
Joba 19:26 REHEFA LEVONA NY HODITRO, IZAO SIMBA IZAO, SADY AFAKA AMIN’NY NOFOKO AHO, DIA HAHITA AN’ANDRIAMANITRA
Nambaran’i Joba tamin’ny faminaniana ny faharesen-dahatra nananany, ho afaka amin’ny nofony izay ho lo sy levona miaraka amin’ny hodiny simban’ny aretina ao am-pasana; izy kosa hatsangana ho fanahy, ary hahita an’Andriamanitra Mpanavotra azy. Ity ampahany ity dia ahitana ny niandohan’ny fanambarana mikasika ny fiavian’i Kristy amin’ny andro farany sy ny fitsanganan’ny tena amin’ny maty, ary ny hitondran’Andriamanitra famaliana soa farany ho an’ireo izay mahatoky Azy.
Joba 19:27 ENY IZAHO NO HAHITA AZY
Nitana toerana lehibe mihoatra lavitra noho ireo fanirian’i Joba hafa rehetra hita ato amin’ity boky ity ny faniriany fatratra ny hahita an’Andriamanitra Mpamonjy azy. Niandry fatratatra ilay andro izay hahafahany mahita ny tavan’Andriamanitra izay mpanafaka azy tanterka i Joba.
Toy izany koa no anirian’ireo mpino ao amin’ny Test V ny fiavian’ny Mpanavotra azy (1Kor 1:7; 2Tim 4:8) sy ny andro fahatanterahana; koa “ny tabernakelin’Andriamanitra dia ho eo amin’ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny” (Apok 21:3), ka “hahita ny tavany” izy ireo (Apok 22:4).
(1 Korintiana 1:7) « ka dia tsy latsaka amin'ny fanomezam-pahasoavana rehetra ianareo, miandry ny fisehoan'i Jesosy Kristy Tompontsika, »
(2 Timoty 4:8) « hatrizao dia tehirizina ho ahy ny satro-boninahitry ny fahamarinana, izay homen ny Tompo, Mpitsara marina, ho ahy amin izay andro izay; ary tsy ho ahy ihany, fa ho an'izay rehetra tia ny fisehoany koa. »
(Apokalypsy 21:3) « Ary nahare feo mahery avy teo amin'ny seza fiandrianana aho nanao hoe: Indro, ny tabernakelin'Andriamanitra dia eo amin'ny olona, ary Izy hitoetra* eo aminy, ary ireo ho olony, ary Andriamanitra no hitoetra eo aminy, dia ho Andriamaniny. [* Gr. hitoetra an-day] »
(Apokalypsy 22:4) « ka hahita ny tavany, ary ny anarany dia ho eo amin'ny handriny. »
Jaona 17:20-26
Jaona 17:21 MBA HO IRAY IHANY IZY REHETRA
Tsy firaisana ara-panambadiana akory ilay firaisana angatahin’i Jesosy am-bavaka, fa firaisana ara-panahy miorina amin’ny fivelomana ao amin’i Kristy (and 23); fahafanterana sy fananana ny fitiavan’ny Ray sy ny fiombonana amin’I Kristy (and 26); fisarahana amin’izao tontolo izao (and 14-16); fandraisana sy finoana ny fahamarinan’ny Teny (and 6); ary ny faniriana hitondra ny famonjena amin’izay very (and 21, 23). Raha misy tsy ao na iray amin’ireo singa ireo aza dia tsy afaka hisy izany firaisana marina nangatahin’I Jesosy am-bavaka izany.
(1) Jesosy tsy nangataka ny mpianany “hanjary iray” (miaraka tampoka vetivety), fa mba “ho iray”: Fiarahana maharitra, izany hoe “ho iray lalandava”, ka firaisana miorina amina fifandraisana iombonan’izy ireo amin’ny Ray sy ny Zanaka, sy amin’ny fananana toetra fototra iray ihany manoloana izao tontolo izao sy ny Teny ary ny tia mamonjy ny very.
(2) Ny fiezahana hamorona firaisana ataon’olombelona amin’ny alalan’ny fihaonana, konferansy na fikambanana maroloha dia mety hiafara amin’ny famadihana io firaisana angatahin’i Jesosy am-bavaka io. Tsy “fihaonana mikendry firaisana” tsara ivelany akory no tao an-tsain’i Jesosy fa mihoatra noho izany, dia firaisana fo, tanjona, saina, ary sitrapo amin’ny lafiny ara-panahy eo amin’ireo olona nanokantena tanteraka ho an’i Kristy sy ny Teny ary ny fahamasinana.
Jaona 17:22 NY VONINAHITRA IZAY NOMENAO AHY
Ny voninahitr’i Kristy dia ilay fiainam-panompoany feno fandavantena sy ny fahafatesany teo amin’ny hazofijaliana ho fanavotana ny taranak’olombelona.
Toy izany koa ny voninahitry ny mpino dia ilay lalan’ny fanompoana feno fanetrentena sy ny fitondrany ny hazofijaliany samirery. Ny fanetrentena, ny fandavantena ary ny fanekena hijaly ho an’i Kristy no ho antoka hahazoantsika mpino firaisana marina sady hitondra antsika ho amin’ny voninahitra marina tokoa.
1 Jaona 3:1-9
Andao hiverenantsika kely ny dikan'ny hoe "ateraka indray" araka ny Baiboly. Raha tena Kristiana isika, dia efa zanaka notorontoronin'Andriamanitra Ray eto amin'ity fiainana ity (1 Jaona 3: 1-2), fa ateraka ho fanahy amin’ny fiverenan’i Kristy (Jaona 3:3-8).
[Ny fahazotoan'ny zanak'Andriamanitra hanao ny sitrapon'ny Rainy sy hifankatia amin'ny namany, ary ny fahatokiana ananany] (1 Jaona 3:1) « Endrey! manao ahoana ny fitiavana nasehon*'ny Ray ho antsika, dia ny niantsoana antsika hoe zanak'Andriamanitra, sady izany tokoa isika! Koa noho izany dia tsy mahalala antsika izao tontolo izao, satria tsy nahalala “an’Andriamanitra” izy. [* Gr. nomen'] » (1 Jaona 3:2) « Ry malala, ankehitriny aza dia zanak'Andriamanitra isika, nefa tsy mbola naseho izay ho toetsika rahatrizay. Fantatsika fa raha hiseho Izy, dia ho tahaka Azy isika, fa ho hitantsika Izy, dia izay tena endriny tokoa. » (ampitahao Jaona 3:3-8, sy Matio 17:1-3)
(Jaona 3:3) « Jesosy namaly ka nanao taminy hoe: Lazaiko aminao marina dia marina tokoa: Raha tsy ateraka indray* ny olona, dia tsy mahazo mahita ny fanjakan'Andriamanitra. [*Na: ateraka avy any ambony] » (Jaona 3:8) « Ny rivotra mitsoka amin'izay tiany, ary renao ny feony, nefa tsy fantatrao izay ihaviany na izay alehany, dia tahaka izany izay rehetra ateraky ny Fanahy. »
(Matio 17:1) « Ary nony afaka henemana, Jesosy dia naka an'i Petera sy Jakoba ary Jaona rahalahiny ka nitondra azy niakatra ho any an-tendrombohitra avo mba hitokana. » (Matio 17:2) « Dia niova tarehy teo anatrehany Izy, ka ny tavany namirapiratra tahaka ny masoandro, ary ny fitafiany tonga fotsy tahaka ny mazava. » (Matio 17:3) « Ary, indreo, niseho tamin'ny mpianatra Mosesy sy Elia, niresaka tamin'i Jesosy. »
(Matio 17:9) « Ary rehefa nidina avy tao an-tendrombohitra izy, dia nandrara azy Jesosy ka nanao hoe: Aza milaza amin'olona ny fahitana, mandra-pitsangan'ny Zanak'olona amin'ny maty. »
Nefa na dia heverina ho zanak'Andriamanitra aza isika dia mpandova miandry fandovana ihany ankehitriny (Romana 8: 14-17) fa amin’ny fiverenan’i Kristy vao tena lasa mpandova mitantana ny zavatra nampanantenain'Andriamanitra.
(Romana 8:14) « Fa izay tarihin'ny Fanahin'Andriamanitra no zanak'Andriamanitra. » (Romana 8:15) « Fa tsy nandray ny fanahim-pahandevozana ho amin'ny tahotra indray ianareo, fa nandray ny fanahin'ny zanaka natsangana, izay iantsoantsika hoe: Aba, Ray ô. » (Romana 8:16) « Ny Fanahy dia miara-milaza amin'ny fanahintsika fa zanak'Andriamanitra isika. » (Romana 8:17) « Ary raha zanaka, dia mpandova; eny, sady mpandova an'Andriamanitra no mpiray lova amin'i Kristy koa, raha miara-miaritra aminy isika mba hiara-manam-boninahitra aminy koa. »
Nahoana no mpandova miandry fandovana ihany izao? Satria zanaka notorontoronin'Andriamanitra fotsiny ankehitriny, tsy mbola nateraka avy any ambony, izany hoe tsy mbola lasa fanahy. (Jaona 3:3, 8)
Rehefa ateraka avy amin'Andriamanitra isika vao lasa mpandova ny Fanjakan'Andriamanitra, sady lasa mpikambana ao amin'ny fianakavian'Andriamanitra amin’ny maha Fanahy.
Alohan'ny hanombohan'ny famoronana ara-panahy dia tsy maintsy torontoronina antsika ara-panahy Andriamanitra Ray. Manao izany Izy amin'ny alàlan'ny fametrahana ny Fanahy Masina ao an-tsaintsika, mba hikambana amin'ny fanahin'olombelona amin'ny fibebahana sy ny batisa. Amin'izany fanorontoronana ara-panahy izany, ny Fanahy Masina dia azo oharina amin'ny tsiranoka iray ary ny sain'olombelona amin'ny atody iray izay iaraisan'ny Fanahin'Andriamanitra.
(1 Petera 1:3) « Isaorana anie Andriamanitra, Rain'i Jesosy Kristy Tompontsika, Izay niteraka antsika indray araka ny haben'ny famindram-pony ho amin'ny fanantenana velona tamin'ny nitsanganan'i Jesosy Kristy tamin'ny maty, » (1 Petera 1:4) « ho amin'ny lova tsy mety simba, tsy misy loto, tsy mety levona, voatahiry any an-danitra ho anareo, »
(1 Petera 1:23) « fa efa teraka indray ianareo, tsy tamin'ny voa mety ho lò, fa tamin'ny tsy mety ho lò, dia ny tenin'Andriamanitra, izay velona sady maharitra. »
(Jakoba 1:18) « Tamin'ny sitrapony no niterahany antsika tamin'ny teny fahamarinana, mba ho santatry ny zavatra noforoniny isika. »
Fantatsika fa ny ampahany amin'ny Fanahy Masina izay raisin'ny olona amin'ny fanorontoronana ara-panahy dia manome azy zavatra mihoatra ny fahafahany manana fiainana mandrakizay. Manome antsika koa ny toetra sy fombam-piainan'Andriamanitra Ray izany (2 Petera 1: 3-4), toy ny fiasan'ny tsiranon'olombelona iray mamindra ny fombany sy ny toetrany amin'ny taranany vao torontoronina ao an-kibon-dreniny. Ary tahaka ny zaza vao torontoronina mitombo ao an-kibon-dreniny, isika koa dia tokony hanomboka mitombo ara-panahy rehefa avy torontoronin’ny Fanahin'Andriamanitra.
Raha tena Kristiana marina ianao araka ny voafaritry ny Baiboly, dia zanaka notorontoronin'Andriamanitra Ray ianao ankehitriny. Voalonaky ny Fanahin'Andriamanitra ianao, dia ilay "voa" ara-panahy manome fiainana mandrakizay amin’ny farany - koa afaka manomboka ny fizotry ny fitomboana ara-panahy ianao. Nefa tsy mbola naterak'Andriamanitra ianao, tsy mbola tonga fanahy – fa mbola tsy nandalo fahafatesana.
Aoka ho azontsika tsara ny momba ny fitomboana ara-panahy tsy maintsy hitranga aorian'ny nanorontoronan'ny Fanahy Masina ny olona iray.